У ААТ "Васілішкі" 10 красавіка 2024 года праведзены навучальны семінар па тэме: "Бяспека дарожнага руху і выканання работ па тэхнічным абслугоўванні, рамонце аўтатранспартнай тэхнікі ў арганізацыях Аграпрамысловага холдынга Кіраўніцтва справамі Прэзідэнта Рэспублікі Беларусь".
Дырэктар ААТ "Васілішкі" інфармаваў удзельнікаў семінара аб вытворча-гаспадарчай дзейнасці прадпрыемства.
З дакладам выступілі: тэхнічны інспектар працы першаснай прафсаюзнай арганізацыі ААТ "Васілішкі" Антон Іосіфавіч Панасевіч.
інжынер па ахове працы РУП "Кіруючая кампанія холдынгу "Аграпрамысловы холдынг Кіраўніцтва справамі Прэзідэнта Рэспублікі Беларусь" Міхаіл Міхайлавіч Міхневіч.
Загадчык сектара кантролю забеспячэння працоўнай дзейнасці УАС ДУ "Галоўнае гаспадарчае ўпраўленне" Андрэй Мікалаевіч Гурцэвіч падвёў вынікі па выкананні Заканадаўства аб ахове працы ў арганізацыях Упраўлення справамі Прэзідэнта Рэспублікі Беларусь у першым квартале 2024 года.
З удзельнікамі семінара праведзены інструктарска-метадычныя заняткі па тэмах:
1. Перавозка небяспечных грузаў аўтамабільным транспартам, пагрузачна-разгрузачныя работы небяспечных грузаў, забеспячэнне пажарнай бяспекі на АЗС.
2. Арганізацыя выканання работ па тэхнічным абслугоўванні і рамонце аўтатрактарнай тэхнікі.
3. Арганізацыя бяспекі дарожнага руху ў арганізацыі.
На Шчучыншчыне плаўна завяршаецца сяўба яравых зерневых культур, аграрыі актыўна працуюць у палях, робячы добры зачын для будучага ўраджаю. Ужо пачалася сяўба цукровых буракоў, першымі ў нашым раёне да яе прыступілі ў ААТ “Васілішкі”. Мясцовыя аграрыі распачалі “салодкую” сяўбу яшчэ на мінулым тыдні.
Усяго ў гэтым годзе цукровымі буракамі ў ААТ “Васілішкі” плануюць засеяць 550 гектараў. Як заўважыў галоўны аграном гаспадаркі Дзяніс Комар, сяўба буракоў – справа даволі далікатная і патрабуе максімальнай увагі, бо прамежак паміж праходам сеялкі і перадпасяўнога культыватара павінен складаць не больш за 10 хвілін. Інакш глеба перасохне, што негатыўна адаб’ецца на ўраджаі цукровых буракоў.
Гэтымі днямі актыўная сяўба цукровых буракоў ідзе на полі каля вёскі Арцішы. Трактарам МТЗ 1221 з васьміметровай сеялкай умела кіруе механізатар Павел Грудзінскі. Павел працуе ў гаспадарцы ўжо 20 гадоў і таму справу сваю ведае дасканала.
– Цукровыя буракі сею ўжо дзясяты год, – адзначае механізатар. – Гэтая культура патрабуе асаблівай ўвагі. Тут трэба захоўваць хуткасны рэжым да пяці кіламетраў у гадзіну і пільна сачыць, каб усё насенне было закрыта на глыбіні 2-3 сантыметры. Таксама важна рабіць папраўку на від глебы, бо на розных палях яна розная. Таму праца патрабуе ад механізатара асаблівай пільнасці. Я ўжо прывык да адказнасці, сам я чалавек мясцовы, з Галавічполя, працую, можна сказаць, на сваёй зямлі. Дзе нарадзіўся, там і прыгадзіўся – гэтая прымаўка дакладна пра мяне, – кажа Павел Грудзінскі.
Паралельна ў ААТ “Васілішкі” поўным ходам ідуць іншыя палявыя работы. Так, на гэтым тыдні ў гаспадарцы пачалі трэцюю падкормку азімага рапсу. Улічваючы спрыяльны тэмпературны рэжым, вядзецца хімпраполка азімых зерневых культур. Уносіцца арганіка пад кукурузу, праводзіцца рэалізацыя насення збожжавых яравых культур.
Сёлета аграрыі ААТ “Васілішкі” чакаюць салідны ўраджай на пасяўной плошчы больш за шэсць тысяч гектараў.
– У гэтым годзе агульная пасяўная плошча ў ААТ “Васілішкі” складае 6415 гектараў, з якіх пад раннія яравыя культуры адведзена 1800 гектараў, – заўважыў галоўны аграном Дзяніс Комар.– Нам трэба будзе пасеяць кукурузу на плошчы 3700 гектараў, сланечнікаў 250 гектараў, бульбы 85 гектараў. Зараз мы актыўна ўносім фосфарныя і калійныя ўгнаенні пад сяўбу і спадзяваемся на спрыяльнае надвор’е.
Праца ў полі – цяжкая, але неабходная для таго, каб у кожнай беларускай сям’і на стале быў хлеб. Таму і ўвага да аграрыяў адпаведная. Як заўважыў прафсаюзны лідар шчучынскіх аграрыяў Генрых Юрэвіч, у ААТ “Васілішкі” створаны добрыя ўмовы працы. Для тых, хто працуе ў полі, арганізавана двухразовае гарачае харчаванне. Работнікі аплачваюць толькі 25% ад кошту ежы, астатняе кампенсуе гаспадарка. Работнікі забяспечаны спецвопраткай і сродкамі індывідуальнай аховы, маюць годны заробак. Належная ўвага ў гаспадарцы надаецца і ахове працы.
На гэтым тыдні ў Шчучынскім раёне завяршылася рэспубліканская акцыя “Наш жывёлавод”. У рамках акцыі прадстаўнікі раённай улады наведвалі жывёлагадоўчыя комплексы нашага раёна, сустракаліся з працоўнымі калектывамі і ўзнагароджвалі лепшых работнікаў.
Апошні візіт у рамках рэспубліканскай акцыі сёлета прыпаў на свінагадоўчы комплекс “Збражкі” ААТ “Васілішкі”. Туды прыехалі першы намеснік начальніка ўпраўлення сельскай гаспадаркі і харчавання райвыканкама Іна Кучура і старшыня райкама прафсаюза работнікаў АПК Генрых Юрэвіч.
– Шчыра радая бачыць перад сабой людзей, якія сумленна працуюць і развіваюць жывёлагадоўлю нашага раёна, – прызналася Іна Кучура.– Зычу, каб вашы поспехі толькі памнажаліся, праца годна аплачвалася, каб у кожнай сям’і былі любоў, спакой і дабрабыт. Шчыры дзякуй за вашу нялёгкую працу.
Таксама перад працоўным калектывам выступіў Генрых Юрэвіч:
– Сёння мы прыехалі з добрай місіяй, штогод праводзіцца акцыя “Наш жывёлавод”, арганізаваная Беларускім прафсаюзам работнікаў АПК. Раней так атрымлівалася, што больш заўважалі сяўбу, уборку збожжавых, нарыхтоўку кармоў, а жывёлаводаў неяк абыходзілі ўвагай. Таму і было вырашана арганізаваць гэтую акцыю. Сёлета мы аб’ехалі ўсе гаспадаркі нашага раёна, адзначалі лепшых па прафесіі, і вось чарга дайшла да вас.
Падзячнымі лістамі і грашовымі прэміямі былі адзначаны аператар працэсу перапрацоўкі зерня Рамуальд Барысевіч, аператар па ветэрынарнай апрацоўцы жывёл Анжаліка Блізнеўская, слесар па рамонце сельгасмашын і абсталявання Алег Гладкіх, аператар племянной свінафермы Ірына Грыгаровіч, вадзіцель аўтамабіля свінагадоўчага комплексу Канстанцін Драздоў, начальнік фермы Валерый Івашка, трактарыст-машыніст свінагадоўчага комплексу Віктар Казлоўскі, аператар па штучным асемяненні Тэрэза Люткевіч, аператар Вадзім Страх.
Свінакомплекс “Збражкі” налічвае каля 78 тысяч галоў жывёлы і такім чынам з’яўляецца найбуйнейшым падобным комплексам у Гродзенскай вобласці. Калектыў адказна ставіцца да сваіх задач, таму нягледзячы на сур’ёзныя маштабы вытворчасці, па якасці тут не саступаюць меншым комплексам і трымаюць адзін з самых высокіх паказчыкаў сярэднясутачнага прыбаўлення ў вазе ў вобласці.
Пасля ўзнагароджвання госці абмеркавалі з працоўным калектывам актуальныя тэмы. Напрыканцы сустрэчы Генрых Юрэвіч адзначыў, што акрамя працы важна таксама берагчы сябе і ўважліва сачыць за сваім здароўем. Добра адпачыць і набрацца сіл можна ў прафсаюзных здраўніцах, якіх па ўсёй краіне налічваецца 15. Тым больш што 50% кошту пуцёўкі аплачваецца гаспадаркай, 25% бярэ на сябе прафсаюз, таксама работніку дадаткова выплачваецца матэрыяльная дапамога.
З 23 сакавіка па 20 красавіка 2024 г. па ініцыятыве Міністэрства лясной гаспадаркі Рэспублікі Беларусь праходзіць рэспубліканская добраахвотная акцыя "Аднавім лясы разам!". Мерапрыемства прымеркавана да Года якасці і ахоплівае ўсе рэгіёны рэспублікі.
У рамках дадзенага мерапрыемства 5 красавіка 2024 г. работнікі ААТ «Васілішкі» з вялікім задавальненнем прынялі ўдзел у традыцыйнай пасадцы лесу ў Гурнафельскім лясніцтве Шчучынскага лясгаса.
Усе працавалі адказна, беражліва саджаючы маладыя дрэвы, і з упэўненасцю ў атрыманні добрага выніку. За час працы ўсе ўдзельнікі гэтай акцыі не толькі высадзілі значную колькасць саджанцаў, але і асвоілі асаблівасці іх пасадкі. Карысная праца на свежым паветры падарыла ўдзельнікам пазітыўныя эмоцыі і магчымасць уласнаручна зрабіць добрую справу.
Дадзеная акцыя дазваляе лепш даведацца, як ствараюцца новыя лясы і колькі працы неабходна, каб з маленькага высадка вырас малады лес.
Дзякуючы сумесным намаганням наша краіна штогод прырастае новымі лясамі - нацыянальным багаццем Рэспублікі Беларусь!
У Беларусі пачалася сяўба цукровых буракоў. Аб гэтым паведамілі БЕЛТА у Міністэрстве сельскай гаспадаркі і харчавання.
Беларускія аграрыі пашыраюць пасеў розных культур. Так, зусім нядаўна ў гэтую працу ўключылі цукровыя буракі. На сённяшні дзень ёй усеяна 1,82 тыс.га, што складае амаль 2 працэнты ад запланаваных аб'ёмаў. Сяўба пачалася ў Брэсцкай і Гродзенскай абласцях, а вось летась у гэты час гэту культуру не сеялі ні ў адной вобласці Беларусі.
Раннія яравыя збожжавыя і зернебабовыя культуры (без кукурузы, грэчкі, проса) пасеяны на 270,9 тыс. га, што складае 43,5 працэнта да плана. Яравыя культуры пасеяны на 305,6 тыс. га - гэта 13,2 працэнта ад плана. У Брэсцкай вобласці гэтыя культуры пасеяны на плошчы 79,7 тыс. га, Віцебскай - 14,2 тыс. га, Гомельскай - 35,9 тыс. га, Гродзенскай - 58,2 тыс. га, Мінскай - 53,4 тыс. га , Магілёўскай - 29,7 тыс. га.
Версия для слабовидящих
