Па аператыўных звестках на раніцу 14 жніўня, аграрыі Беларусі намалацілі 7 мільёнаў 659 тысяч тон збожжавых з улікам рапсу. Гэта на паўтара мільёна тон больш, чым на аналагічную леташнюю дату, паведамілі sb.by у прэс-службе Мінсельгасхарча.

У разрэзе абласцей безумоўным лідэрам застаецца Мінская вобласць, якая першай у краіне пераадолела двухмільённую мяжу. Тут намалацілі 2 мільёны 71 тысячу тон. Брэсцкая вобласць дасягнула выніку ў 1,6 мільёна тон, Гродзенская – 1,496 мільёна. У Гомельскай вобласці намалочана 984 тысячы тон, у Магілёўскай – 859 тысяч, у Віцебскай – 649 тысяч тон.

Убрана культур на зерне (без кукурузы) на плошчы 2 мільёны 66 тысяч гектараў, што складае 85 працэнтаў ад агульнай плошчы 2 мільёны 432 тысячы гектараў. Выцераблена 42 тысячы гектараў лёну, што складае 96 працэнтаў запланаваных плошчаў.

У лік дзяржаўнага заказу паставілі 381 тысячу тон харчовага збожжа (57 працэнтаў ад плана ў 663 тысячы тон), 105 тысяч тон алейнага семя рапсу (105 працэнтаў ад плана), 63 тысячы тон піваварнага ячменю (73 працэнты ад плана ў 86 тысяч тон).

Паралельна з уборкай працягваецца корманарыхтоўчая кампанія. Другім укосам травы скошаны на 807 тысячах гектараў (80 працэнтаў ад плана ў 1 мільён 10 тысяч гектараў). Сена нарыхтавана 506 тысяч тон (71 працэнт ад плана), сенажу – 11 мільёнаў 499 тысяч тон (80 працэнтаў ад плана), сіласу – 398 тысяч тон (2 працэнты ад плана). Агульны аб’ём нарыхтаваных травяных кармоў у пераліку на кармавыя адзінкі дасягнуў 3 мільёнаў 589 тысяч тон (35 працэнтаў ад гадавога плана ў 10 мільёнаў 131 тысячу тон).

Для будучай сяўбы азімых культур у наяўнасці ёсць 219 тысяч тон дзеючага рэчыва мінеральных угнаенняў (азотных, фосфарных і калійных), што складае 127 працэнтаў да плана.

СБ