У ААТ “Васілішкі” ў гэтым сезоне разлічваюць атрымаць рэкордны ўраджай яблыкаў, аднак вялікі аб’ём пладоў адначасова павялічыў нагрузку на тых, хто павінен паспець прыбраць іх з дрэў у аптымальныя тэрміны. З 23 па 25 верасня да ўборкі ў садзе падключыліся супрацоўнікі арганізацый і ўстаноў Шчучынскага раёна, штодня змяняючы адна адну і дапамагаючы гаспадарцы справіцца з найбольш напружаным перыядам.

Пладовы сад «Васілішак» займае 120 га, з якіх 80 га з’яўляюцца пладаноснымі. У верасні тут адначасова вырашаюцца некалькі задач: яблыкі, прызначаныя для працяглага захоўвання, неабходна зняць з дрэў у вызначаны перыяд, частку апалага пладоў хутка сабраць для перадачы перапрацоўчым прадпрыемствам, а сабраны ўраджай своечасова вывезці з саду.

Па папярэдняй ацэнцы, у гэтым сезоне гаспадарка разлічвае сабраць каля 2000 тон яблыкаў супраць 100 тон годам раней. Да 24 верасня ўжо ўбрана каля 400 тон.

• Уласных работнікаў у гэты перыяд нам недастаткова яшчэ і таму, што паралельна працягваецца ўборка агародніны. Таму людзей даводзіцца размяркоўваць адразу па некалькіх напрамках. Падключаем таксама працаўнікоў гаспадаркі, супрацоўнікаў мясцовых школ, прадстаўнікоў раённых арганізацый. Цяпер асабліва важна, каб яблыкі не заставаліся на дрэвах даўжэй за належны тэрмін, – распавёў начальнік пладовага саду ААТ «Васілішкі» Пётр Лютастанскі.

Паралельна збіраюць і падалка. Хоць і яе аб’ём значна меншы за асноўны ўраджай, аднак сабраныя яблыкі вельмі запатрабаваны беларускімі перапрацоўчымі прадпрыемствамі і хутка знойдуць свайго пакупніка.

У адзін з дзён да зборкі яблыкаў выйшлі супрацоўнікі занальнага цэнтра гігіены і эпідэміялогіі, раённай інспекцыі па насенняводстве, каранціне і абароне раслін, сектара спорту райвыканкама, раённай аптэкі № 6 і фінансавага аддзела райвыканкама – усяго 14 чалавек.

Сярод тых, хто прыйшоў на дапамогу гаспадарцы, – памочнік лекара-гігіеніста ЦГЭ Валерыя Назарава. Спецыяліст не ўпершыню выходзіць на дапамогу сельгаспрадпрыемствам раёна. Увесну яна ўдзельнічала ва ўборцы камянёў з палёў у філіяле «Жалудокскі агракомплекс».

• Мы самі вырашылі дапамагчы гаспадарцы. Ужо пазнаёміліся з людзьмі, якія працуюць тут. Праца нескладаная, але фізічная нагрузка адчуваецца, прычым зусім інакш, чым на звычайным працоўным месцы. Для нас гэта нават добра – атрымліваецца дадатковая актыўнасць, – распавяла дзяўчына.

Па яе словах, да працы падрыхтаваліся загадзя.

• Узялі з сабой пальчаткі, ежу, надзелі зручны абутак. У гаспадарцы нам выдалі вядра, таму ўсім неабходным для работы мы забяспечаны, – дадала Валерыя Назарава.

Разам з Валерыяй у садзе працавала аграном Таццяна Стральчэнь з раённай інспекцыі па насенняводстве. Для яе сёлетняя ўборка яблыкаў таксама стала працягам удзелу ў сезонных работах у гаспадарцы.

Увесну я ўжо дапамагала тут, у «Васілішках», прыбірала камяні з палёў. Цяпер прыйшла на дапамогу падчас уборкі яблыкаў. Праца, вядома, адрозніваецца ад той, якой займаешся звычайна, але такая фізічная актыўнасць ідзе на карысць, – сказала Таццяна.

Пакуль адны збіраюць яблыкі, іншыя займаюцца іх вывазам. У садзе ўвесь час перамяшчаецца транспарт з кантэйнерамі, таму перад пачаткам працы для ўсіх супрацоўнікаў правялі мэтавай інструктаж, асобна растлумачыўшы правілы бяспекі пры знаходжанні побач з тэхнікай.

Збор ураджаю тут ідзе адразу па некалькіх напрамках. Частка яблыкаў прызначаная для захоўвання і наступнай рэалізацыі ў зімовы перыяд. Сярод вырошчваных у гаспадарцы гатункаў спецыялісты называюць “Алесю”, “Беларускае салодкае”, “Хані Крысп”, “Гластэр”, “Шампіньён” і “Айдарэд”. Гэтыя гатункі карыстаюцца попытам і добра падыходзяць для захоўвання.

Частка ўраджаю пасля ўборкі адпраўляецца ў сховішча і будзе рэалізоўвацца ў зімовы перыяд. Сярод пакупнікоў гаспадаркі гандлёвыя сеткі, райспажыўтаварыствы і мясцовыя крамы. Яшчэ каля 340 тон гаспадарку плануе накіраваць у лік дзяржаўнай замовы. У зімовы і вясновы перыяд гаспадарка таксама разлічвае выйсці на замежныя рынкі.

Умовы працы прыцягнутых работнікаў у садзе таксама праверылі прафсаюзны лідэр аграрыяў Генрых Юрэвіч і начальнік аддзела працы і заработнай платы райвыканкама Яўген Мяцько.

_{Дыяна Кейка.
Фота аўтара.}