Сельгаспрадпрыемства “Васілішкі” ў Шчучынскім раёне – адно з самых паспяховых не толькі ў раёне, але і ва ўсёй Гродзенскай вобласці. І гэта адна з галоўных прычын, чаму тут жадаюць працаваць маладыя кадры. Штогод калектыў папаўняецца выпускнікамі аграрных ВНУ і каледжаў – прычым прыязджаюць не толькі па размеркаванні, але і па клічы сэрца.

Адна з такіх гісторый – Арцём Галонскі. Ён вырас у вёсцы і вырашыў: “дзе нарадзіўся, там і спатрэбіўся”. Узяў мэтавае накіраванне ў мясцовай гаспадарцы, скончыў Ваўкавыскі аграрны каледж і каля двух месяцаў таму вярнуўся на малую радзіму.

Маладому спецыялісту з дыпломам заатэхніка адразу даверылі пасаду памочніка начальніка малочнатаварнага комплексу «Галавічполе».

• З 5 раніцы я ўстаю, у 5:30 ужо на працы, – распавядае Арцём. – Ранішняя кармленне да 12, потым абед, з 17 да 19 – вячэрняя. Працую з панядзелка па пятніцу, субота і нядзеля – выходныя.

На комплексе – больш за 1100 галоў жывёлы, з якіх 800 – дойны статак. Ад Арцёма залежыць, што кожны дзень апынецца на кармавым стале.