Сёння начальнік Шчучынскага РАУС Аляксандр Мельнікаў і яго намеснік па ідэалагічнай рабоце і кадравым забеспячэнні Павел Кузняцоў пабывалі ў ААТ "Васілішкі" з важнай місіяй. Праваахоўнікі ўручылі Падзяку і грашовы падарунак Андрэю Янкевічу, які ў мінулую нядзелю знайшоў у лесе дзіця, якое згубілася.

-- Мы выказваем шчырыя словы падзякі ўсяму калектыву за неабыякавасць, за тое, што вы не засталіся ўбаку, а адгукнуліся на чужую бяду, – звярнуўся да прысутных Аляксандр Уладзіміравіч. - Для пошуку дзіцяці былі паднятыя ўсе сілы і, вядома ж, мы не маглі не звярнуцца да грамадскасці, да працоўных калектываў. Прынятыя меры дазволілі максімальна ахапіць месца правядзення пошукавых мерапрыемстваў і знайсці дзіця.

Паважаны Андрэй Антановіч, сёння ў чарговы раз, але ўжо ў прысутнасці Вашага кіраўніка і калег хачу выказаць Вам словы падзякі. Вы апынуліся ў патрэбным месцы ў патрэбны час, і Вашы ўважлівасць і пільнасць дазволілі Вам знайсці дзіця. Гэта самае галоўнае. Акрамя гэтага былі зэканомлены значныя дзяржаўныя сродкі. Ужо была гатова прыбыць авіяцыя з г. Ліды і вайскоўцы, былі запытаны дадатковыя войскі з г. Мінска. Пошук дзіцяці знаходзіўся на асабістым кантролі ў Міністра па надзвычайных сітуацыях Рэспублікі Беларусь і Міністра ўнутраных спраў. Без перабольшання можна сказаць, што Вы здзейснілі подзвіг. Вялікі дзякуй кіраўніку гаспадаркі Антону Часлававічу Бурносу за аператыўныя дзеянні, арганізацыю каманды ў складзе 18 чалавек і за такіх работнікаў!
 
Ганарыцца сваім калектывам і Антон Часлававіч.

- У лічаныя хвіліны, даведаўшыся аб здарэнні, сабрала каманду Марыя Антонаўна Саковіч, - распавёў Антон Часлававіч. - Яна не толькі спецыяліст па пытаннях дзяржаўнай сістэмы надзвычайных сітуацый і грамадзянскай абароны, але і неабыякавы чалавек, які блізка да сэрца прымае чужую бяду. Вельмі важна, што нашы людзі выдатна разумелі, што ў дадзенай сітуацыі знайсці дзіця - гэта не толькі задача яго бацькоў і праваахоўнікаў, гэта не толькі бяда родных, але і наша агульная. І мы не маглі застацца ў баку.

Аляксандр Уладзіміравіч моцна паціснуў руку кожнаму, хто браў удзел у пошуках дзіцяці і знайшоў хвілінку, каб прыйсці на сустрэчу з праваахоўнікамі.
 
Вельмі важна ў такіх сітуацыях дзейнічаць аператыўна і ўсім светам, але няхай іх лепш ніколі не здараецца.

Ганна РУДСКАЯ.
Фота аўтара.