Не за гарамі пасяўная кампанія, а гэта значыць, што на палях Шчучыншчыны зноў загудуць трактары і іншыя сельскагаспадарчыя машыны. Для таго, каб пасеяць усё своечасова, патрэбна надзейная тэхніка, якая не падвядзе ў аказны момант. З мэтай праверкі стану сельскагаспадарчых машын на мехдвары ААТ “Васілішкі” ў аграгарадку Бакшты прайшоў тэхагляд.

Спецыяльная камісія ўважліва праверыла кожную з 29 машын на бакштаўскім мехдвары. Таксама стан сельскагаспадарчай тэхнікі ацанілі старшыня Шчучынскага райвыканкама Аляксей Садоўскі і яго першы намеснік – начальнік упраўлення сельскай гаспадаркі і харчавання райвыканкама Ігар Аверка.

Праверка тармазной сістэмы, габарытных агнёў, рулявога кіравання, спраўнасць гукавых сігналаў і наяўнасць вогнетушыцеляў з аптэчкамі – усё гэта ўключаў агляд машын. Дадаткова правяралася дакументацыя.

Як адзначыў галоўны інжынер ААТ “Васілішкі” Яўгеній Вашчыла, у хуткім часе тэхагляд павінны прайсці 160 адзінак тэхнікі, сярод іх 125 трактараў, 29 з якіх энерганасычаныя, 24 пагрузчыка, 2 бульдозера і тры эскаватара. Што тычыцца зернеўборачных і кормаўборачных камбайнаў, то яны будуць рыхтавацца да мая.

– Тэхнікі ў нас дастаткова для выканання ўсіх запланаваных работ, – расказвае Яўгеній Вашчыла. – У нашай гаспадарцы працуюць каля 130 трактарыстаў-механізатараў, якія цягам зімы добра падрыхтавалі машыны да тэхагляду. Зараз можна сказаць, што тэхніка, неабходная для вясенне-палявых работ, гатова на сто працэнтаў.

Летась парк тэхнікі ААТ “Васілішкі” папоўнілі два энерганасычаныя трактары “Беларус 3522” вытворчасці Мінскага трактарнага завода, таксама сярод навінак зернеўборачны камбайн “Гомсельмаш”.

_{Алег ШЫШЛОЎСКІ}

_{Фота аўтара.}