Чарговыя, але не апошнія рэкорды. Зноў у ААТ "Васілішкі". І зноў ужо вядомыя ўсім прозвішчы. Ушаноўвалі Дзмітрыя Тарасевіча, які першым у раёне намалаціў 3000 тон збожжа, Дзмітрыя Савіцкага, які перавёз ужо чацвёртую тысячу тон, і маладога камбайнера Андрэя Вераб'я, чый рэкорд перасягнуў за 2000 тон збожжа.


Марыць не шкодна. Ужо нехта, а хлебаробы ведаюць гэта. Мараць аб розным - ад новых інструментаў да кватэры. І заслужанае атрымліваюць. І ад кіраўніцтва роднай гаспадаркі, і ад райвыканкама. І нават з вялікіх гарадоў прыязджаюць, асабіста дзякуюць за ўпартую працу.
 


Вось і ў панядзелак павіншаваць васілішкаўскіх хлебаробаў прыехалі старшыня Шчучынскага райвыканкама Аляксей Садоўскі, начальнік упраўлення рэкламы і паказу тэхнікі ААТ "Гомсельмаш" Мікалай Собаль, прафсаюзны лідэр аграрыяў раёна Генрых Юрэвіч і дырэктар ААТ "Васілішкі" Антон Бурнос. Падарункі, падзякі і віншаванні былі перададзены проста ў поле.

- Выклікі былі, - распавядае камбайнер Дзмітрый Тарасевіч. - Але мы ўжо вопытныя. Ніякія дажджы і навальніцы не сталі перашкодай. Ужо які год нашы аграрыі ўносяць важкі ўклад у абласную збожжавую скарбонку, і я рады быць часткай вялікай перамогі.

Будучы не проста вопытным, але і закаханым у сваю прафесію аграрыем, Дзмітрый Тарасевіч стаў трэцім у краіне, хто намалаціў тры тысячы тон збожжа на айчынным камбайне "Гомсельмаша". Цяпер ён будзе бачыць сябе ў навінах на экране новага тэлевізара Horizont, які атрымаў у падарунак за працоўныя дасягненні.

- Заўсёды прыемна прыязджаць да хлебаробаў і віншаваць самых лепшых, - адзначыў Аляксей Садоўскі. - Можа, з аднаго боку, і не зразумеюць многія, як мага пару месяцаў у годзе не бачыць нічога, акрамя працы. Але ж сябе не пераробіш. Калі чалавек працуе з поўнай самааддачай, шчыра жадаецца заахвочваць яго дакладную службу сельскай гаспадарцы. 
 


- Проста мы такія, - апелюе Аляксею Садоўскаму камбайнер Андрэй Верабей. - У працу ўкладваем і вопыт, і веды, і душу. За наш клопат зямля добрым ураджаем парадавала. Таму нашмат раней, чым летась, прыпар завершым і адсвяткуем.

Гэта ўжо восьмы сезон для 29-гадовага хлебароба. А знаёмы ён з сялянскай працай з 19-ці гадоў. Напрацоўваючы з кожным годам досвед, Андрэй разабраўся ў хітрасцях і нюансах тэхнікі і ў метадах працы. Дзякуючы чаму ў апошнія гады на мясцовых "Дажынках" ён прызнаецца лепшым сярод маладых камбайнераў.

Кіроўца Дзмітрый Савіцкі і ў мінулыя гады, і ў гэтым сезоне быў першым тысячнікам і двухтысячнікам. Прымаючы падарункі і віншаванні, ён падкрэсліў, што ў пагоні за рэкордамі важна і ўраджай не страціць.
 
- Мы ўсе працуем добрасумленна, - сказаў Дзмітрый Савіцкі. - Можа, я проста крыху больш азартны. Прыемна бачыць, што не дарма імкнешся.

Таксама ў ліку пераможцаў раённага спаборніцтва на ўборцы збожжавых і зернебабовых культур камбайнеры Уладзімір Сяргей (1000 тон збожжа), Валерый Кепель (2000 тон), Яўген Васілька (2000 тон) і Антон Гайдукевіч (2000 тон).
 
У ААТ "Васілішкі" па стане на 5 жніўня ўбрана 90 працэнтаў збожжавых і зернебабовых (без кукурузы, грэчкі і проса). Намалочана 37 тысяч тон збожжа, ураджайнасць - 62,6 цэнтнера з гектара.


 
Дыяна Кейка.
Фота аўтара.