Мінулы верасень стаў фактычна яшчэ адным летнім месяцам. Толькі зараз да нас прыйшло па-сапраўднаму восеньскае надвор'е. Доўгачаканыя дажджы змянілі да лепшага сітуацыю на палях, хаця і не ў той меры, як хацелася земляробам. Паводле звестак Белгідрамета, на значнай тэрыторыі рэспублікі верхні слой глебы добра ўвільготнены. З-за нераўнамернага размеркавання ападкаў і моцнага ўсушэння недахоп вільгаці захоўваецца ў большасці раёнаў паўднёва-ўсходняй палавіны Беларусі і месцамі на паўночным захадзе краіны. Па звестках некаторых метэастанцый, глеба сухая. На такіх плошчах умовы для правядзення сяўбы, з'яўлення ўсходаў і далейшага развіцця азімых культур па-ранейшаму складаныя. Апрацоўка ўсушаных глеб абцяжарана. На засеяных плошчах ля азімых збожжавых культур ідзе прарастанне збожжа, з'яўляюцца ўсходы, месцамі -трэці ліст, на самых ранніх пасевах пачалося кушчэнне. У азімага рапсу працягваецца лістаўтварэнне.

У пачатку кастрычніка ўмовы для прарастання збожжа палепшацца, чаканыя кароткачасовыя дажджы папоўніць утрыманне вільгаці ў верхніх пластах глебы.



На 30 верасня ў цэлым па краіне пасеяна 69 працэнтаў запланаваных плошчаў азімых збожжавых на зерне (год таму - 72). У Брэсцкай вобласці - 81 (87), Гродзенскай - 79 (78), Мінскай - 75 (77), Віцебскай - 61 (72), Магілёўскай - 59 (75), Гомельскай - 55 (48). Нагадаем, у Віцебскай і Магілёўскай абласцях працу трэба было завяршыць да 25 верасня, Мінскай і Гродзенскай - 30 верасня, Гомельскай і Брэсцкай - 5 кастрычніка. Затрымка з пасевам у аптымальныя тэрміны зніжае ўраджайнасць у сярэднім на адзін працэнт за суткі спазнення.


Улічваючы, што яшчэ неабходна пасеяць больш за чвэрць плошчаў, цалкам магчыма, што тэрміны азімай сяўбы падоўжаць значна.



Хоць земляробы заклапочаныя лёсам будучага хлеба, працягваецца ўборка ўраджаю гэтага года. Коратка аб іншых працах. На раніцу 30 верасня ўбрана па 99 працэнтаў грэчкі і проса, 66 — бульбы, 64 — кукурузы на сілас, 55 — агародніны, 35 — цукровых буракоў, узнята 97 працэнтаў ільнотрасты. Але на палях яшчэ шмат культур. Вяскоўцам не варта змяншаць тэмпы ўборкі, каб як мага хутчэй увесь ураджай апынуўся ў засеках.



sb.by