Яўген Васілька – старшы камбайнер ААТ “Васілішкі” Шчучынскага раёна. За рулём камбайна ён ужо 5-ы сезон. Большую частку дня праводзіць са сваім дакладным баявым канём – салатавым «Claas LEXION 560».

У свае 33 гады ён адзін з першых у Гродзенскай вобласці намалаціў дзве тысячы тон збожжа, першым у раёне пераадолеў мяжу звыш чатырох тысяч тон збожжа. У гэтым годзе наш герой стаў пераможцам абласнога спаборніцтва за дасягненне высокіх паказчыкаў на ўборцы ўраджаю збожжавых і зернебабовых культур.

Калі свет толькі пачынае абуджацца, старшы камбайнер ААТ “Васілішкі” Яўген Васілька ўжо рыхтуецца да новага дня на полі. Сыходзіць на працу мужчына ў шэсць раніцы, а вяртаецца зацемна. Як адзначыў Яўген, рухае ў працы ім не пагоня за ўзнагародамі, а любоў да працы.

• Кожны дзень я адчуваю, што раблю нешта важнае. Ад нашай працы залежыць ураджай, а значыць, і дабрабыт многіх людзей, не магу дазволіць сабе расслабіцца, – растлумачыў працаўнік.

Вырас Яўген у вёсцы. Назіраючы за працай бацькоў, заўсёды разумеў важнасць працы на зямлі. Бацька Яўгена прапрацаваў усё жыццё на камбайне, маці працавала бухгалтарам у калгасе. Хоць родам мужчына з Дзятлаўскага раёна, але за 9 гадоў працы ў ААТ “Васілішкі” ўжо роднымі сталі палі Шчучынскага раёна. У гэтых краях Яўгена Васілька прынялі сардэчна, падалі кватэру.

Сёння наш працаўнік не толькі добры адмысловец, але і выдатны муж і бацька дваіх дзяцей. Познімі вечарамі пасля працы Яўгена сустракаюць кахаючая жонка Алёна і сынкі Міша і Ваня.

• Жонка заўсёды мяне падтрымлівае. Дзівіцца, як я вытрымліваю цэлы дзень. Яна ведае, што ў полі бываюць розныя сітуацыі: часам тэхніка падводзіць, часам надвор’е не радуе, а часам проста бывае цяжка спраўляцца са стомленасцю. Дзякуючы таму, што дома мяне чакаюць кахаючая жонка і дзеці, адчуваю сябе больш упэўнена. Гэта надае сіл, каб спраўляцца з любымі цяжкасцямі, – падзяліўся Яўген Васілька.

Асновай для атрымання добрага выніку Яўген Васілька лічыць адказны падыход да справы.

• Неабходна ўважліва сачыць за станам камбайна, кожнай шрубкай і вузлом, праводзіць рэгулярныя праверкі. Гэта дапамагае пазбегнуць нечаканых паломак у самы адказны момант. Нават найменшая няспраўнасць можа прывесці да значных страт, як па часе, так і па якасці сабранага ўраджаю, – растлумачыў старшы камбайнер.

Перадавік жніва ніколі не шкадаваў аб выбары прафесіі, расказвае пра яе з гонарам. Адданасць справе і любоў да зямлі робяць героя прыкладам для пераймання. Дзякуючы такім людзям, як Яўген Васілька, сельская гаспадарка працягвае развівацца, а свежы хлеб заўжды будзе на нашых сталах.